اسمه إيه ده.........

بالصلاة ع النبي
إحنا عندنا اسمه إيه ده
أحسن واحد يحلل مباريات..
ويحط التشكيل..
الأساسي والبديل..
ويقولك إمتي تضيع وقت
وإمتي تشوط ع التلات خشبات..
وعندنا اسمه إيه ده
أحسن مهندس خبير..
بيرمش بس للبير..
يطّلع غاز وبترول
وبعدين يهديه للإخوة الخواجات..
وعندنا اسمه إيه ده
مجرم قانون دولي ودستور
وإيده خفيفة أوي ف التعديلات
ويشيل من هنا يحط هنا
جواهرجي يا ربي
ملقاط..
وعندنا اسمه إيه ده
أحسن واحد في التلاتين سنة الأخيرة
يتعامل مع الأزمات..
هما كلمتين..
الدوام للّه..
والفاتحة ع الأموات..
وعندنا اسمه إيه ده
عفريت آثار
ولو ف يوم جاله برد
أبو الهول يموت
وتنتحر الأهرامات..
وعندنا اسمه إيه ده
ملهوش حل ف الزراعة
يقول للأرض قمح
تقوله حاضر يا سيدي
والشعب ياكل عيش
وفينو بسمسم وبقصمات..
وعندنا اسمه إيه ده
صاحب القهوة
كلنا نتشرد ونتيتم
لو بعد الشر بعد الشر
زي الناس ما بتموت مات..
بس يا أخي أنا مش فاهم
لما إحنا عندنا اسم إيه
واسمه إيه
أمّال اسمها إيه دي
مالها
ما بتتقدمش ليه
وشاخت
وداخت
ولفت السبع لفات..

» لمن يريد معرفة معنى اسمه