لا أنا مؤيد.......ولا معارض

لا أنا مؤيد ولا معارض
ولا إخوانى ولا وطنى
ولا ثاير ولا مارد
ولا مهتم غير بيكى ...
منيش حابب تسَمينى
ولا مهتم بـ التصنيف
و إن حبيتى تنادينى
قوليلى يا إبنى بدون تكليف ...
قوليلى يا مصرى أنا أمك
و وصينى على أخويا...
قوليلى ده يبقى من دمك
و هـ تفضل روحكوا جوايا ...
بعيد عن حزبه أو حزبك
هـ تفضل أمكم واحده
هـ يفضل دمكم واحد
هـ تفضل روحكوا متواحده ...
قوليلى يا مصرى يا أمى
و وصينى عشان منساش
قوليلى الدم بـ يتعبنى
و وصينى و قوليلى بلاش