بزيادة يا بلدنا
يا مدوّقانا الغم
زرعوكى نار ومرار
سقيوا العذاب بالدم
يا معلّمانا البُكا
و معيّشانا فـ قهر
يا ملوّنة بالسواد
أيامنا لآخر الدهر
متغرّبين فيكي
و الروح بقت فـ الحلق
ننده نلاقيكي
تتدارى وسط الخلق
سنى يادوب عشرين
و الدنيا كَت بمبى
كملت انا الستين
على ذنب مش ذنبى
دة ذنب كلب السيادة
و تملّى نازل عض
يا مبيّعانى الروح
فى مزاد خلاص انفض
فاكرة كلامنا زمان
قولتي هانكبر سوا !!
دُقت المرار ألوان
و جروحى مالهاش دوا
لو طالبة حِما أرضك
هتلاقى ملايين غلابة
طب سايبة ليه عرضك
و بينهشوه الديابة ؟!!
يا حبيبتى بس أؤمرى
هانجيكي و نلبّى
و بلاش تعيشي فـ دور
مجروحة و تخبّي
يا وطن تعالىَ هناك
و اطلق عشانى الطير
دة أنا لسه بستناك
و بقول لعله خير